काठमाडौँ — सातामा पहिलो कारोबार दिन आइतबार सेयर कारोबार मापक २२.१० अंकले बढेर २ हजार ५२.६५ अंकमा पुगेको छ । अघिल्लो दिनको तुलनामा यो १.०८ प्रतिशतको वृद्धि हो । गत साता बुधबार र बिहीबार दुबै दिन बढेको नेप्सेले आइतबार पनि सोही प्रवृति पछ्याएको हो ।आइतबार नेप्से बढेपनि अघिल्लो दिनको तुलनामा कारोबार रकम भने घटेको छ । ५६ हजार ७ सय २६ वटा कारोबारबाट ७० लाख ४३ हजार ४ सय ५७ कित्ता सेयर किनबेच भए । उक्त किनबेचमा २ अर्ब ९२ करोड रुपैयाँको कारोबार भएको छ । गत बिहीबार ३ अर्ब १९ करोडको कारोबार भएको थियो ।